Eluf ta’ parteċipanti mistennija jingħaqdu f’Ħaż-Żabbar nhar il-Ħadd 13 ta’ Settembru, f’edizzjoni speċjali li tfakkar il-75 anniversarju mill-bidu tal-pellegrinaġġ
Nhar il-Ħadd 13 ta’ Settembru 2026, f’Jum il-Festa tal-Madonna tal-Grazzja f’Ħaż-Żabbar, se ssir il-75 edizzjoni tal-Pellegrinaġġ tal-Muturi u r-Roti, organizzat mill-Għaqda Pellegrinaġġ Muturi u Roti tal-Parroċċa ta’ Ħaż-Żabbar.
Din is-sena l-pellegrinaġġ għandu tifsira partikulari hekk kif qed jiġi ċċelebrat il-75 anniversarju tiegħu, mill-1951 sal-2026. Matul is-snin, din l-attività saret waħda mit-tradizzjonijiet marbuta mill-qrib mal-festa tal-Madonna tal-Grazzja, u kull sena tiġbor flimkien għadd kbir ta’ sewwieqa tal-muturi, ċiklisti u familji minn diversi lokalitajiet madwar Malta.
Ir-roti se jitilqu mir-Rabat fid-9.00am, u minn hemm jgħaddu minn Ħ’Attard, Ħal Lija, Ħal Balzan, Birkirkara, Fleur-de-Lys, Santa Venera, il-Ħamrun, il-Marsa, Raħal Ġdid, Ħal Tarxien u l-Fgura, qabel jaslu Ħaż-Żabbar.
Il-muturi, min-naħa tagħhom, se jitilqu mill-Mosta fid-9.00am. Ir-rotta tagħhom se tgħaddi minn Birkirkara, San Ġwann, San Ġiljan, Tas-Sliema, il-Gżira, l-Imsida, Ħal Qormi, Ħaż-Żebbuġ, is-Siġġiewi, il-Marsa, Raħal Ġdid, Bormla u l-Fgura, biex imbagħad ukoll jaslu Ħaż-Żabbar.
Iż-żewġ pellegrinaġġi mistennija jaslu quddiem is-Santwarju tal-Madonna tal-Grazzja għal ħabta ta’ 12.30pm, fejn issir Ċelebrazzjoni Marjana fuq iz-zuntier tas-Santwarju.
Il-Pellegrinaġġ tal-Muturi u r-Roti ilu għal għexieren ta’ snin jiġbor flimkien id-devozzjoni lejn il-Madonna tal-Grazzja ma’ atmosfera ta’ festa u parteċipazzjoni popolari. Il-wasla tal-muturi u r-roti f’Ħaż-Żabbar hija fost il-mumenti li jiġbdu ħafna nies lejn il-qalba tal-belt matul il-jum tal-festa.
L-edizzjoni tal-2026 mistennija tkun waħda speċjali, mhux biss minħabba n-numru importanti ta’ 75 sena, iżda wkoll bħala ċelebrazzjoni ta’ tradizzjoni li kompliet tgħaddi minn ġenerazzjoni għal oħra sa mill-1951.
Ritratt: Andre Gialanze
Leave a Comment